כג

א

יְדִידַי, שְׁעוּ מִנִּי, אֲמָרֵר בְּבִכְיָתִי וְאוּלַי שְׁבִיב לִבִּי אֲכַבֶּה בְדִמְעָתִי

ב

בְּיַעַן יְקוֹד לִבִּי כְתָפְתֶּה, וְעַצְמוֹתַי כְּמוֹ קַשׁ, וְהִנֵּה אֵשׁ וְעֵצִים מְדוּרָתִי

ג

וּבִנְפֹל עֲלֵי עַיִן תְּנוּמָה וְתַרְדֵּמָה, תְּעוֹפֵף שְׁנַת עֵינַי וְתִדַּד תְּנוּמָתִי

ד

אֲשׁוֹטֵט וְאֶרְאֶה כוֹכְבֵי רוֹם וּמַזָּרָיו, כְּאִלּוּ חֲקֹר סוֹדָם מְלֶאכֶת עֲבוֹדָתִי

ה

וְיוֹנָה עֲלֵי אָמִיר תְּקוֹנֵן עֲלֵי פֵרוּד אֲחוֹתָהּ אֲשֶׁר נָדְדָה וְתֶהְמֶה כְּהֶמְיָתִי

ו

וְכָל עֵת אֲשֶׁר אֶדֹּם וְאוֹחִיל מְצֹא מַרְפֵּא תְּעוֹרֵר יְגוֹן לִבִּי וְתַרְבֶּה מְהוּמָתִי

ז

וְאָמוּת בְּמַכְאוֹבִי - וְנֶגְדִּי צְרִי גִלְעָד, וְאֶצְמָא אֱלֵי מַיִם-וְגִיחוֹן לְעֻמָּתִי

ח

בְּנַפְשִׁי, אֲשֶׁר אֹהַב חֲיוֹתוֹ וְשַׁלְוָתוֹ - וְיִשְׂמַח לְיוֹם אֵידִי וְיֶאְהַב מְחִתָּתִי

ט

אֲהַבְתִּיו בְּעוֹדִי בֶּאֱמֶת וּבְתָם לֵבָב - וְהָיָה גְמוּלִי שָׁוְא, וְשֶׁקֶר תְּמוּרָתִי

י

וְלָאֵל מְיֻדָּעַי חֲשׁוּקַי אֲשֶׁר אָרְחוּ, וְרָחַק, בְּעֵת רָחְקָם, מְשׂוֹשִׂי וְשִׂמְחָתִי

יא

רְאִיתִים וְהֵם עַל הַגְּמַלִּים-וְסָר לִבִּי, וְכָשַׁל מְאֹד כֹּחִי, וְכָלְתָה אֱיָלוּתִי

יב

וְאֵיכָה אֱחִי אַחַר פְּנוֹתָם, וְאֶשָּׁאֵר בְּנָסְעָם-וְהֵם רוּחִי וְנַפְשִׁי וְנִשְׁמָתִי

יג

הֲיִחְיֶה אֱנוֹשׁ מֵאֵין נְשָׁמָה וְיִשָּׁאֵר - הֲכִי נִשְׁאֲרָה מֵאֵין נְשָׁמָה גְּוִיָּתִי.

יד

אֱלֹהִים יְהִי עִמָּם בְּנָסְעָם וּבַחְנוֹתָם, הֱיוֹתָם לְמוּל עֵינַי בְּנָסְעִי וּבַחְנוֹתִי

טו

וְיַשְׁקֵם בְּכָל מַחֲנֶה בְּמָטָר כְּמֵי עֵינַי, וְיַמְטֵר עֲלֵיהֶם טַל וּמָטָר כְּדִמְעָתִי

טז

וְיָמִית גְּמַלֵּיהֶם אֲשֶׁר נָשְׂאוּ אוֹתָם בְּיַעַן שְׁלוֹמִי נָשְׂאוּ אָז וְשַׁלְוָתִי

יז

וְאוּלָם אֲקַוֶּה שׁוּב לְבָבִי אֱלֵי גֵוִי וְאוֹחִיל מְצֹא מַרְפֵּא וְשִׁקּוּי לְמַחְלָתִי

יח

בְּשׁוּבִי אֱלֵי דוֹדַי וְשָׁמְרִי בְרִיתוֹתָם וְשׁוּרִי פְנֵיהֶם הַמְּאִירוֹת אֲפֵלָתִי:

יט

אֲחִיָּה, אֲשֶׁר נַפְשִׁי יְחַיֶּה בְשֵׂכֶל פִּיו, וְאִם יַאֲרִיךְ חָלְיִי - בְּנִיבוֹ אֲרוּכָתִי

כ

וְיִצְחָק, אֲשֶׁר תִּצְחַק אֲדָמָה בְּלֶכְתּוֹ בָהּ, וְתָעֹז וְתִתְגָּאֶה בְּעֻזּוֹ, כְּגַאְוָתִי

כא

וְחַיּוּן, אֲשֶׁר חַיַּי תְּלוּיִים בְּשַׁלְוָתוֹ, וְתָבוֹא, בְּעֵת יַחְלֹף שְׁלוֹמוֹ, חֲלִיפָתִי

כב

שְׁלָשְׁתָּם אֱיָלוּתִי, וְחֵילִי עֲלֵי קָמַי, וְחַרְבִּי, וְתוֹתָחִי, וְרָמְחִי, וְצִנָּתִי

כג

חֲקַקְתִּים עֲלֵי לוּחַ לְבָבִי, וְיוֹתֶרֶת כְּבֵדִי, וְאִישׁוֹן עֵין יְמִינִי, וּבָבָתִי.