1 [ולה] ימדח רבנא שמואל (ולו מהלל את רבנו שמואל).
2 קצידה לשלמה הקטן פי אלנגיד (שירה לשלמה הקטן על הנגיד).
קוּם, הַזְּמַן, וּלְבַשׁ עֲדָנֶיךָ וּקְשֹׁר שְׁבִיסֵי שַׂהֲרוֹנֶיךָ!
עַד אָן תְּנַצֵּל עֶדְיְךָ, עַד אָן תִּפְשֹׁט לְפָנֵינוּ סְדִינֶיךָ?
אִם אֵין לְךָ נֵזֶר לְהִתְנוֹסֵס, כִּי חֻלְּלוּ נִזְרֵי צְפוּנֶיךָ־
מֵעִם שְׁמוּאֵל קַח רְבִידֵי פַז, יִהְיוּ לְךָ עַל צַוְּרוֹנֶיךָ
יָצִיץ בְּךָ שִׁירוֹ כְּמוֹ אֵטוּן, קוּם וַעֲלֹץ וּמְשֹׁךְ אֲטוּנֶךָ
דָּרַךְ בְּךָ כּוֹכָב, צְלַח וּרְכַב, כִּי בָא אֲשֶׁר יָאִיר אֱשׁוּנֶךָ
גָּבַהּ בְּרוֹשׁ תִּדְהָר בְּבֵית יִצְהָר עַל נַעֲצוּצֵי קִמְּשׂוֹנֶיךָ
צָמַח לְךָ חֹרֶשׁ מְאֹד מֵצַל- פַּנֵּה לְפָנָיו קִיקְיוֹנֶךָ
נִקְרָה לְךָ הַיּוֹם יְאוֹר אֵיתָן־ רַוֵּה בְּמֵימָיו צִמְּאוֹנֶךָ
עוּרָה, לְבָבִי, מַה לְּךָ נִרְדָּם, עוּרָה וְהָקִיץ רַעֲיוֹנֶיךָ!
כַּמָּה גְעַרְתִּיךָ לְבַל תּוֹסִיף דַּעַת, לְבַל יִרְבּוּ יְגוֹנֶיךָ
הָסֵר תְּלֻנָּתָךְ וְאַל תִּזְכֹּר הַיּוֹם לְפָנַי עִצְּבוֹנֶיךָ
הִכּוֹן לְךָ, כִּי יֶשׁ לְךָ הַיּוֹם רִיב עִם בְּנֵי לֵוִי צְפוּנֶיךָ
הַקְרֵב לְעֻמָּתָם שְׂעִיר חַטָּאת- אוּלַי יְכֻפַּר בּוֹ עֲווֹנֶךָ
אָנָּא, כְּרוּב מִמְשַׁח, לְאַט עָלַי, עַד אֶעֱרֹךְ מִשְׁפָּט לְפָנֶיךָ!
מַה סּוֹד מְשׁוּגָתִי וּמַה פִּשְׁעִי, כִּי תַעֲבִיר עָלַי חֲרוֹנֶיךָ?
תִּכְתֹּב לְךָ סֵפֶר כְּאִישׁ מָדוֹן גַּם תַּאֲרִיךְ עָלַי לְשׁוֹנֶךָ
תַּרְעֵם בְּקוֹל שָׁאוֹן אֲשֶׁר לֹא כֵן, לִהְיוֹת סְאוֹן רַעַשׁ סְאוֹנֶךָ
אַל תַּחֲשֹׁב כִּי צָלְלוּ אָזְנַי יוֹם הַעֲלוֹת בָּם שַׁאֲנָנֶךָ:
לוּ רָצְתָה נַפְשִׁי לְהִתְבָּאֵשׁ- אָז שָׁחֲקוּ מֵימַי אֲבָנֶיךָ
הִנֵּה בְּחַר מִשְׁפָּט וְדַע מַה טּוֹב, דּוּן, כִּי אֲנִי חָפֵץ בְּדִינֶךָ
עַל מַה תְּרִיבֵנִי, פְּלִיל צֶדֶק, כִּי תַאֲרִיךְ בִּי קִלְשׁוֹנֶךָ?
כִּמְעַט חֲשַׁבְתִּיךָ לְמִגְדַּל עֹז- עַד נָפְלוּ עָלַי אֲבָנֶיךָ
כִּמְעַט קְרָאתִיךָ זְמוֹרַת זָר- עַד נֶהְפְּכוּ לִי נַעֲמָנֶיךָ
תִּצְמָא לְךָ נַפְשִׁי-וְתַשְׁקֵנִי תַּחַת צְמָאִי רֹאשׁ פְּתָנֶיךָ
אֶזְרַע לְפִי חֶסֶד - וְתָשִׂים אֶת רֵאשִׁית תְּבוּאָתִי בְּגָרְנֶךָ
מַה זֶּה, גְּבִיר, מַה זֶּה וְעַל מַה זֶּה תִּצְפֹּן כְּמוֹ אֵלֶּה לְבָנֶיךָ ?
תָּרוּץ בְּלִי עָווֹן וְתִכּוֹנֵן לִקְרַאת שְׁלוּמֶיךָ אֱמוּנֶיךָ
תִּגְאֶה וְכַשַּׁחַל תְּצוּדֵנִי עַד כִּי תְכַלֶּה בִּי שְׁנוּנֶיךָ ?
אִם הָאֱלֹהִים הוּא הֱסִיתָךְ בִּי- יָרַח קְטֹרֶת עַד רְצוֹנֶךָ
אוֹ אִם בְּנֵי אָדָם - אֲרוּרִים הֵם כִּי גֵרְשׁוּנִי מִלְּפָנֶיךָ
יַכְרֵת אֱלֹהִים דּוֹבְרֵי כָזָב הַקּוֹרְצִים בֵּינִי וּבֵינֶךָ
כִּי פָרְשׂוּ רֶשֶׁת לְיַד מַעְגָּל וַיְבַעֲרוּ עָלַי עֲשָׁנֶיךָ
זָדוּ כְּמוֹ צִיבָא בְּבֶן שָׁאוּל וַיְדַבְּרוּ שֶׁקֶר בְּאָזְנֶיךָ.
מִי זֶה אֲשֶׁר יָרִים בְּךָ יָדוֹ, אֵי זֶה זְבוּב יַבְאִישׁ שְׁמָנֶיךָ ?
מֵרִים בְּךָ יָדוֹ - כְּמֵרִים יָד בִּשְׁנֵי בְנֵי עַמְרָם קְצִינֶיךָ.
הַשִּׁיר הֲלֹא לָכֶם, בְּנֵי לֵוִי, וּלְךָ לְבַד מִתַּחְכְּמוֹנֶיךָ !
אִם עָמְדוּ שָׂרִים בְּמִשְׁמַרְתָּם- הָיוּ נְגִידֵיהֶם סְגָנֶיךָ
יִשְׁכַּל אֲבִי נָבָל אֲשֶׁר יַחְשֹׁב לַעְקֹר כְּצִיץ נוֹבֵל אֲרָזֶיךָ!
אֶשְׁלֹף לְךָ חַרְבִּי וְאֶגְעַר בּוֹ: סוּר, פֶּן תְּגַלֶּה יַד קְלוֹנֶךָ
תִּפַּח בְּאֵשׁ פֶּחָם וְגַם תִּזְרַע בִּמְקוֹם חֲרֵרִים זֵרְעוֹנֶיךָ
תִּיגַע וְלֹא תוּכַל עֲלוֹת אֵלָיו עַד תֶּאֱסֹף רוּחַ בְּחָפְנֶיךָ
נָפַל לְךָ חֶבֶל בְּסוֹד הֵימָן וּבְסוֹד בְּנֵי אָסָף מְבִינֶיךָ
הִנֵּה לְךָ עָלָיו שְׁנֵי עֵדִים גַּם עוֹד שְׁלֹשָׁה נֶאֱמָנֶיךָ:
הַתֹּם וְהַיֹּשֶׁר וְהַבִּינָה- זֶה מִלְּבַד שֵׁבֶט אֱמוּנֶיךָ
קוּם וַעֲטֵה, הַשַּׂר, מְעִיל כָּבוֹד- הִנֵּה אֲמָרַי פַּעֲמוֹנֶיךָ
הַעַל תְּהִלָּתִי אֲשֶׁר שָׂמָה רָבִיד מְקֻשָּׁר עַל גְּרוֹנֶךָ!
אַחַת נְשָׂאתִיהָ כְּמוֹ תֹרֶן לָשֵׂאת בְּרֹאשׁ כָּל הַר תְּרָנֶיךָ
קוּם וַעֲדֵה גָאוֹן וְהִנָּשֵׂא, כִּי עִמְּךָ הִנֵּה בְּמֹאזְנֶיךָ
חֶבְרוֹן וְעֻזִּיאֵל וּמִישָׁאֵל וּשְׁאָר בְּנֵי לֵוִי זְקֵנֶיךָ
הַנּוֹשְׂאִים אָרוֹן עֲלֵי כָתֵף, הַשּׁוֹמְרִים מִקְדַּשׁ אֲדוֹנֶיךָ
תָּרוּם בְּךָ קֶרֶן סְפָרַד עוֹד מִיּוֹם הֱיוֹתָךְ עַד זְקוּנֶיךָ
תַּרְחִיב בְּךָ פֶה עַל בְּנֵי שִׁנְעָר, הַשּׁוֹאֲבִים מִמַּעֲיָנֶיךָ
מַה תִּגְבְּהִי, בָּבֶל, וּמַה תִּגְאִי, שִׁנְעָר, בְּמָעֻזֵּי גְאוֹנֶיךָ?
דַּע, כִּי בְאַרְצֵנוּ חֲבַצֶּלֶת- לֹא פָרְחָה בִנְאוֹת שְׁרוֹנֶיךָ
שָׂרֵי פְלִילִיָּה לְךָ עֵד, כִּי פֶּה פָעֲרוּ נֶגֶד עֲדָנֶיךָ.
אַל תַּחְשְׁבֵנִי כִּי בְרֹב תִּקְוָה אַפִּיל תְּחִנָּתִי לְפָנֶיךָ
אוֹ מֵאֲשֶׁר יִירָאֲךָ לִבִּי- לוּ כוֹכְבֵי שַׁחַק מְעוֹנֶךָ.
הָאֵל יְהִי עִמָּךְ, וְאַל יַעְמֹד שָׂטָן לְעוֹלָם עַל יְמִינֶךָ
וּמְצָא בְעֵינָיו חֵן וְשֵׂכֶל טוֹב וּרְאֵה בְנֵי בָנִים לְבָנֶיךָ!