„עֲזֹב הֶגְיוֹן בְּמַהְלַל כָּל סְגָנִים וְאַל תִּתְחַר בְּנִרְגָּנִים וְשׁוֹנִים
וְהוֹדֵה רַב יְקוּתִיאֵל לְבַדּוֹ, בְּנוֹ יִצְחָק, אֲדוֹנֵי הָאֲדוֹנִים
אֲשֶׁר לָבַשׁ תְּהִלָּה כַמְּעִילִים וְעָטָה הוֹד כְּמַעְטֵה הַסְּדִינִים״.
עֲנִיתִיהוּ - וְרַעְיוֹנַי נְבוּכִים וְאֵין בִּי לַעֲנוֹת כֹּחַ וְאוֹנִים:
לְאַט עָלַי וְתֵן פּוּגָה לְלִבִּי, הֲיָם אָנִי וְאִם כֹּחִי אֲבָנִים?
בְּיַעַן כִּי הֲלָמוּנִי כְאֵבִים, הֲדָפוּנִי אֲפָפוּנִי יְגוֹנִים
וְהִנֵּה הֶחֳלִי בִּלָּה בְשָׂרִי וְהִכְאִיב לֵב וְהִבְהִיל רַעֲיוֹנִים
וְאֶתְגּוֹלֵל בְּצִירִים עַל יְצוּעַי כְּמִתְגּוֹלֵל עֲלֵי קוֹצִים וְצִנִּים
וְיָגַעְתִּי בְּאַנְחָתִי וְאֵידִי וְנִלְאֵיתִי נְשׂא תוּגוֹת וְאוֹנִים
וְקָם עָלַי כְּאַכְזָרִי זְמַנִּי וְיָרַד בִּי לְמַעְמַקֵּי שְׁאוֹנִים
וְכָשַׁלְתִּי וְנָפַלְתִּי בְּרִשְׁתּוֹ וּמִכְמַרְתּוֹ וּפֶחָיו הַטְּמוּנִים
זְמַן בּוֹגֵד, אֲשֶׁר בּוֹגְדִים יְאַהֵב וְשָׁב אֶל כָּל בְּלִיַּעַל בְּפָנִים
וְכִפַּת כָּל נְדִיבֵי עַם יְיַבֵּשׁ וּבַדֵּי הַנְּבָלִים רַעֲנַנִּים
הֲכִי כִי לַפְּתָאִים הַנְּבָלִים תְּהִלַּת חֵן וְהוֹד, לֹא לַנְּבוֹנִים.
לְזֹאת אַף יֶחֱרַד לִבִּי וְיִתַּר, אֲמָרֵר בַּבְּכִי כִּבְנוֹת יְעֵנִים
וְעָלָיו אֶעֱשֶׂה מִסְפֵּד כְּתַנִּים וְעָלָיו נוֹזְלֵי עֵינַי כְּעֵינִים
וְעַל בּוֹגְדִים אֲשֶׁר בָּגְדוּ כְּנַחַל וְעָפוּ אֶל אֲרֻבָּתָם כְּיוֹנִים
וְהַמַּעְיָן אֲשֶׁר קֶדֶם אֲדַמֶּה לְרַוּוֹתוֹ כְּמֵימֵי צִמְּאוֹנִים
בְּחַנְתִּיהוּ - וְהִנֵּה הוּא כְּאַכְזָב וּמֵימָיו נֶהְפְּכוּ לִי רֹאשׁ פְּתָנִים!
וְהַכֶּרֶם אֲשֶׁר שׂוֹרֵק חֲשַׁבְתִּיו וְדִמִּיתִי נְטָעָיו נַעֲמָנִים -
בְּחָקְרִי אֶת יְנִיקוֹתָיו מְצָאתִים זְמוֹרַת זָר וְסוּרֵי הַגְּפָנִים!
אֲקַוֶּה לַעֲשׂוֹת עֵנָב - וְעָשָׂה בְּאוּשִׁים וַחֲרֻלִּים קִמְּשׂוֹנִים
מְכָרַנִי וְהֵפֵר אֶת בְּרִיתִי, אֲהַבְתִּיהוּ - וְלֹא שָׁמַר אֱמוּנִים
וְהַנֶּחְשָׁב בְּתוֹךְ אַנְשֵׁי שְׁלוֹמִי אֲשֶׁר בָּטַח לְבָבִי בוֹ לְפָנִים -
וְהָיִיתִי כְּמוֹ שִׂכִּים בְּעֵינָיו וְאֶל צִדָּיו וּבִלְבָבוֹ צְנִינִים.